MIZORAM STATE DAY

 Vawiin February ni 20, 2021 hi Mizoram State Day niin India dan hnuaia state puitling anga kan inrelbawl tanna champha a ni a, vawi 34 kan hmanna tur a ni. Mizoram state alo nihdan zingkawng tlema zawng han thlir let leh ta ila. India independent hnuah India tlang mite dinhmun siamthat a ni a, Mizoram pawh kum 1948 khan member 35 awmna Advisory Council neiin, kum 1951 thleng khan he Advisory Council hi a awm a.

Kum 1952 khan Mizoram chu Autonomous District Council- ah hlankai a ni a, member 17 an awm a ni. Hetih hunlai hian Mizoram chu ‘Lushai Hills District Council’ tia la koh niin kum 1954 ah ‘Mizo Hills District Council’ tiin a hming hi thlak a ni. Kum 1972 January thla khan Mizoram chu ‘Union Territory’ ah hlankai a ni leh a, member 30 an awm. Kum 1986 khan India sawrkar leh MNF chuan inremna thuthlung Peace Accord (Memorandum Of Settlement) an tih Point 13 lai awmna chu an ziak fel a. India sawrkar aiawhin Home Secretary R.D.Pradhan , MNF Party aiawhin an President Laldenga leh Mizoram sawrkar aiawhin Pu Lalkhama, Chief Secretary te chuan hming an sign hnan ta a ni. He inremnaah hian Mizoram chu state puitlinga hlankai tur tih ziah tel a ni .

India sorkar chuan he inremna hi bawhzuiin kum 1986 August ni 4 khan khatih hunlaia Home Minister Butta Singh chuan Lok Sabha ah Mizoram state puitlinga hlankaina tur bill ‘Mizoram Statehood Bill 1986’ chu a pulut a, awlsam taka pass niin Rajya Sabha ah pawh pass a ni ta zel a. Mizoram chu India ram state 23-na ni turin India Constitution Article 371-G hnuaiah ziahluh alo ni ta a ni. Amaherawhchu he dan hi pass ni mahse hman tan nghal a ni lo a, a kumleh 1987 February ni 20 khan Mizoram chu state puitlinga hlankai a lo ni ta a, Lammual ah he hun pawimawh tak hi Prime Minister Rajiv Gandhi chuan a hmanpui a ni.